|
Foefieman Fona slaan weer toe
Inwoners aan die kus en
huurmotorbestuurders wees gewaarsku. Fona (nie
sy regte naam nie) is weer doenig. Sy
nuutste in 'n string van niksvermoedende
slagoffers is 'n huurmotorbestuurder van
Swakopmund genaamd Dawid Ipinge vir wie hy
met slinkse praatjies 'n rat voor die oë
gedraai het en van N$120 ontneem het onder
valse voorwendsels Saterdagaand in
Kuisebmond.
Die selferkende
dwelmslaaf was vir byna 'n maand lank stil
en het Saterdag weer sy loopskoene aangetrek
en met sy slinkse streke begin om sy dwelm
gewoonte te onderhou. Sy optrede bewys dat
dwelmslawe tot uiterstes toe sal gaan in
hulle soeke na 'n “quick fix”.
Ipinge en Fona se paaie
het in Kuisebmund gekruis nadat hy kliente
uit Swakopmund afgelaai het. “Ek was oppad
na die taxi rank om weer kliente te gaan
optel en na Swakopmund terug te keer toe hy
my stop”, vertel 'n verslae Ipinge.
Hy het my meegedeel dat
hy in Frankestraat in Vineta, Swakopmund
woon. Ek is woonagtig in Swakopmund en het
hom geglo. Hy wou eers gou 'n boks vis gaan
optel en daarna moes ek hom na Narraville
neem om sy vrou wat daar op hom gewag het te
gaan kry voor ons na Swakopmund sou vertrek.
Hy het by my N$ 120
geleen om te betaal vir die boks vis en het
hand en mond belowe om dit terug te besorg
die oomblik wanneer ons by sy vrou in
Narraville opdaag. Hy het my ook die
versekering gegee dat hy sommer vir al die
sitplekke in die huurmotor vir die rit na
Swakopmund sou betaal en het my gevra om nie
enige ander kliente op te laai nie. Hy was
baie oortuigend en ek het hom die geld gegee
en ingestem om hom na sy bestemming te neem.
Na ek hom die geld gegee
het, het hy my na 'n huis in Kuiseb-mond
laat ry waar hy die motor verlaat het en toe
na 'n rukkie baie haastig teruggekeer het.
Hy het my toe aangesê om na Narraville te
ry. Oppad na Narraville het hy begin om
kokaiene in die motor te rook en het daarop
aangedring dat ek nie enige van die motor se
vensters moes afrol nie.
Toe ons in Narraville
arriveer het hy my gevra om by verskeie
huise stil te hou in die Funky Town
woonbuurt op soek na sy vrou. Hy het na die
deure van wonings geloop en gaan klop. Na 'n
hele paar keer het hy na die motor
teruggekeer en my vertel dat sy vrou glo
klaar weg was Swakopmund toe met 'n
geleentheid vroëer die aand.
Hy het my toe gevra om na
die Narraville polisiestasie te ry waar sy
broer glo werksaam is sodat hy geld kon kry
en dit wat hy aan my verskuldig was terug te
kon besorg. Toe ons by die polisietasie
aankom het hy agter die toonbank
ingehardloop en sy deuntjie heel verander.
Ek skuld die man en kan
hom nie betaal nie het hy die offisier aan
diens meegedeel. Hy het toe om genade begin
pleit en die huurmotorbestuurder gesmeek om
Maandag die geld wat hy hom skuld te kom
haal.
Fona se moeder is
gekontak en sy het die geld verskuldig aan
die huurmotor bestuurder namens haar seun
verhaal vir die soveelste keer. Ek is raadop
vir my kind se doen en late en vrees vir die
dag waneer hy seergemaak gaan word het sy
gesê. Sy het verlede week sestig plakkate
met sy gesig daarop gemaak en dit onder
plaaslike huurmotorbestuurders versprei om
hulle te waarsku teen Fona.
Hy is vir ‘n paar uur in
polisiebewaking gehou en op Sondagmiddag
vrygelaat. Op 'n vorige geleentheid het Fona
glo sy goue tande vir N$1200 verkoop om geld
vir dwelms in die hande te kry.
Sy familielede moes hom
ook al by 'n verlate plek tussen Walvisbaai
en Swakopmund gaan haal waar hy gelos was
deur 'n huurmotorbestuurder wat nie vir sy
foefie wou val nie. Hy het eers vir Fona sy
klere laattrek uit en toe net in sy
onderbroek by die voertuig uitgegooi.
In nog 'n foefie vir
dwelms is 'n wel-bekende dwelmverslaafde
dame opgemerk waar sy met haar kind op haar
heupe by verskeie deure vir hulp aanklop.
Haar snert storie is dat sy geld nodig het
om haar kind wat geval het en mootlik sy arm
gebreek het by 'n dokter te kry of dat sy
sopas van Windhoek in Walvisbaai aangekom
het. |
